01 / 08 Nju-Jork, SHBA · 1999
Tre vëllezër nga Nju-Jorku
Ylli · Agron · Mehmet
Ylli (24), Agron (23) dhe Mehmet (21) Bytyqi — shtetas amerikanë, të lindur në Ilinois (Aurora e Joliet) e me bazë në Nju-Jork, me origjinë nga Kosova. Në pranverën e 1999-s, teksa Kosova digjej, u nisën vullnetarë për në vendlindjen e prindërve.
02 / 08 Shqipëri · stërvitja
Batalioni Atlantiku
U bashkuan me „Batalionin Atlantiku" (Atlantic Brigade) — njësinë e vullnetarëve shqiptaro-amerikanë të formuar në SHBA, së bashku me qindra shqiptaro-amerikanë të tjerë, duke lënë jetën e sigurt në Perëndim për t'u rreshtuar në mbrojtje të vendit të lindjes, vendit të të parëve.
03 / 08 Kufiri · qershor 1999
Fronti i Pashtrikut
Hynë në Kosovë përmes Malit të Pashtrikut, një nga frontet më të ashpra të luftës, mbi Prizren — në vijën ku takohen Shqipëria dhe Kosova.
04 / 08 Prizren · 23 qershor 1999
Premtimi
Kur lufta mbaroi, vëllezërit Bytyqi iu përgjigjën kërkesës së një familjeje fqinje rome për ta shoqëruar drejt kufirit me Serbinë. U nisën për të ndihmuar, pa e ditur se ai udhëtim humanitar do të ishte udhëtimi i tyre i fundit. Një akt humanizmi dhe besimi te paqja, që u shndërrua në fillimin e tragjedisë së tyre.
05 / 08 Merdare · 23 qershor 1999
Arrestimi te kufiri
Kaluan pak përtej Merdares, mbi vijën e pashënuar kufitare. Afër zonës kufitare u ndaluan nga policia serbe për „hyrje të paligjshme".
06 / 08 Prokuple, Serbi · korrik 1999
Gjyqi në Prokuple
Gjykata për Kundërvajtje në Prokuple i dënoi me 15 ditë burgim. Më 8 korrik 1999 u urdhërua lirimi i tyre, por në vend që të liroheshin, u nxorën nga burgu, iu dorëzuan Njësive Speciale të Policisë Serbe dhe u zhdukën me forcë.
07 / 08 Petrovo Sello · rreth 10 korrik 1999
Petrovo Sello
U dërguan në bazën në Petrovo Sello. Aty u ekzekutuan me duart e lidhura dhe me plumba pas koke, ndërsa trupat e tyre u fshehën në një varr masiv — larg vendlindjes së prindërve, larg Kosovës dhe larg Amerikës, vendit që e quanin shtëpi.
08 / 08 Petrovo Sello · 2001
Të gjetur pas dy vitesh
Në korrik të vitit 2001, trupat e vëllezërve Bytyqi u gjetën dhe u zhvarrosën nga varri masiv i Petrovo Sellos. Aty u zbuluan edhe 71 viktima të tjera shqiptare, të transportuara fshehurazi nga Kosova për të zhdukur provat e krimeve të luftës, në zbatim të strategjisë shtetërore serbe të njohur si: „S'ka trup, s'ka krim."
Sipas raportit të ICMP · Petrovo Sello I & II. Shih „Shiko më shumë".
